البنوته .
كبرت البنوتة كبرت ست الكل صار بدها تتزوج تتركني وتفل .
، لما سمعت ابوي مشغلها تذكرت حالي وانا صغيرة،
كان ابوي صديقي دائما،
ياخدني معه على كل المشاوير،
ويجبلي شغلات زاكية لما يرجع من الشغل، كان كل شي يصير معي اركض لعنده واعيطله،
وعلاقتي في كثير منيحة،
بس لما كبرت وصرت بالمدرسة،
حسيت اني بعدت عنه،
يعني صار في كتير مواضيع ما بتنحكى معه،
وصرت دائما احكي مع امي،
حتى بفترة مراهقتي لما كان يشد علي بموضوع افكر انه بيكرهني،
واصير احكي اوووف ابوي صار يكرهني....
وانا بكالوريا تقدملي شب،
الشب كتير كان منيح بس ابوي رفضه، بدون ما يعطيني سبب مقنع،
بس بدو ياني اكمل تعليمي ...
انا وقتها كان عاجبني الشب وبدي يا،
صار يحكيلي يابا لما تصيري بعمر تقدري تقرري وتكوني بالجامعة بخليكي تتزوجي !
بس بمرحلة البكالوريا كان يضل يجي لعندي؛ ويسهر معي طول الليل، ويضل يحكيلي انجحي لحتى افتخر فيكي ،
كنت اشوفه كيف يشتغل طول اليوم،
لحتى يوفرلي للدروس الخصوصية،
وكيف كل ما اجيب علامة عالية اشوفه مبسوط ومكيف ...
يوم النتائج كان متوتر اكتر مني،
وبس واثق اني رح اتفوق وارفع راسه ...
يا الله شو كنت خايفة اخيبله امله،
وما اجيب المعدل الي يخليني ادرس صيدلة ،
بس لما طلعت النتيجة اول مرة بشوفه بيضحك من قلبه اجا وحضني وصار يحكيلي مبروووووك يا بنتي ....
وطبعا دخلت الجامعة ودرست الشي الي بحلم في،
وانا بالجامعة رجع ابوي مثل صديقي،
صار دائما يحكي معي ويطمن علي،
وانا اروح احكيله كل شي واتشاور معه بالمحاضرات واحكيله عن يومي،
بفترة كان وضعه صعب، شفت كيف كان يحاول بس يدبرلي قسط الجامعة وما يحسسني بالنقص بالجامعة ،
كان كل ما شب بدو يحكي معي اخاف، احيانا احس اني نفسي متل هالبنات احب وانحب بس اتذكر ابوي وتعبه بعد الشغل، اتذكر نظرة الثقة الي بيطلعها علي،
بحكي هدفي اخلص جامعة مش احب !
لازم اخلي يكون فخور بتخرجي ...
يوم مناقشتي اجا هو وامي وقعدوا يحضروا انا كنت متوترة كتير بس لما شفته نسيت كل شي،
وكانت المناقشة بتجنن وحتى يوم تخرجي نظراته كانت بتجنن حسسني قديش فخور فيي....
بعد فترة لما حدا تقدملي،
وحس اني بدي اوافق لقيته قاعد وحاطط اغنية "كبرت البنوتة كبرت ست الكل، ".رحت لعنده لقيت الدمعة بعيونه،
قلتله مالك يابا؟
قلي خلص بنتي كبرت ورح تروح لحدا ثاني ..
قلتله : بس انا بنتك ومستحيل اتخلى عنك؛ او احب حدا تاني ...
جد يومها حسيت انه زعلان كتير،
ونفسه ما اوافق لما وافقت بعد تفكير كتير حسيت بشعوره كان غريب مبسوطلي كتير وبنفس الوقت خايف علي ...
قلتله بتعرف كل فتاة بابيها معجبة
وانا ما وافقت الا لأنني حسيت ان في من صفاتك
ما كنت قادرة احس بشعوره وخوفه،
الا يوم عرسي لما اجا وحضني وقلي
انتبهي عحالك يابا،
بكرا يمكن الله ياخد امانته،
انا علمتك تكوني قوية بدوني ومعي، وعلمتك اني صديقك اوعك تخيبي املي فيكي واوعك تسكتي لزوجك لو زعلك او تخليه يزعل منك، .
خليكي قد حالك،
وعلمتك دائما تنجحي بهالوقت
انا مش خايف عليكي بس رح استفقدك
انا حضنته ومتتت من البكاء ....
بنت ابوها بتكون على قد حالها،
الي ابوها صديقها ما بتغلط،
لانها هي بتحترمه اكتر ما بتخاف منه،
هي بتخاف عزعله مش من عقابه،
لانه الي بربي بنته عالخوف والعقاب،
رح يجي يوم تجيبلك بهدلة وبتبرد!
ولي بيغلط ما بخاف من ربنا ....
الأب احن حدا بالدنيا،
وتعبه وحياته كلها عشان اولاده .
0 تعليقات